Tommabitar

Okkur Tomma finnst agalega gaman að gera svona orkubita fyrir ferðir eins og kannski sést hérna á síðunni.  Þessir eru í miklu uppáhaldi og kalla ég þá Tommabita þar sem hann á alfarið heiðurinn af þeim.  Þeir eru ekki bara frábærlega bragðgóðir heldur skemmir ekki fyrir hvað þeir eru litríkir og fallegir. Það tekur enga stunda að græja þessa og við borðum þá jafnt sem millibita á daginn og sem nesti í ferðunum okkar.  Eins og vanalega er enginn viðbættur sykur og við finnum verulegan mun á okkur þegar við höldum okkur við þannig matarræði.

Uppskriftin er þessi:

3 dl hafrar

1 dl goji ber

½ dl chia fræ

½ dl trönuber

1 dl rúsínur

1 dl grófar kókosflögur

1 dl þurrkuð epli

250 gr döðlur

Sykurlaust súkkulaði plata.

Aðferð:

Leggið döðlurnar í bleyti í heitt vatn í c.a. 5 – 7 mín. Því næst sigtið þið þær frá og maukið í matvinnsluvél.  Þetta verður einskonar mauk sem heldur allri blöndunni saman.  Blandið þurrefnunum í skál og munið að skera eplin í hæfilega bita. Blandið svo döðlumaukinu við og hnoðið saman í höndunum.

Setjið bökunarpappír í eldfast mót og hellið blöndunni út í þannig hún fylli vel út í formið og frystið í 30 mín. Á meðan er tilvalið að bræða súkkulaðið í vatnsbaði og skreyta svo blönduna og skella þeim aftur í frysti í 30 mín.

Því næst takið þið blönduna út og nú ætti hún að vera orðin vel þétt í sér og skerið hana í mátulega bita.

Volla og verði ykkur að góðu!